Втора вечер на „Си-До“: Децата пораснаа, хитовите останаа исти - 30 години Си-До приказна што трае!

Втората вечер од јубилејното, 30-то издание на детскиот фестивал „Си-До“ се претвори во вистинска симфонија од емоции, спомени и радост, вечер што уште долго ќе одекнува во срцата на публиката.

Под светлата на сцената, фестивалот не беше само музички настан – беше мост меѓу минатото и сегашноста, место каде што генерации повторно се пронајдоа преку песната што ги обележала нивните најубави детски денови.

На сцената повторно застанаа оригиналните изведувачи на безвременските фестивалски хитови „Наташа од трето три“, „Метро и Жилет“, „Боби баш ми е галје“ и други, а нивното враќање предизвика силни емоции и вистинска магија во салата со изведба во живо подржани со оркестарот ДИВА. Со првите ноти, публиката пееше во еден глас, додека насмевките, солзите радосници и громогласните аплаузи создадоа атмосфера што ретко се доживува.

„Вечерва не гледавме само концерт. Вечерва го видовме детството како повторно оживува пред нашите очи“ – коментираа присутните, видно возбудени од секој настап и секој миг исполнет со носталгија.

Особено впечатлив беше моментот кога различни генерации – деца, родители и поранешни фестивалски учесници – заедно ги пееја песните што со децении остануваат дел од колективната меморија. Токму тоа беше најсилната порака на вечерта: музиката нема возраст, а „Си-До“ останува вечна врска меѓу генерациите.

Директорот на фестивалот Дарко Шерденков со видлива емоција се обрати пред публиката:

„Три децении ‘Си-До’ не е само фестивал, туку дом на детската радост, талент и искрени емоции. Вечерва докажавме дека вистинските вредности никогаш не стареат. Кога ќе ги видите сите овие генерации обединети во песна, знаете дека сме создале нешто што ќе трае засекогаш. На фестивалот Си-До на изминатите 30 изданија се изведени и продуцирани околу 600 детски композиции со учество од над 2500 деца како солисти, така и учесници во детскиот хор и балет“.

Фестивалот е една музичка платформа со големо музичко културно богатсво кое се пренесува од генерација на генерација.

Секоја изведба беше проследена со овации, а салата пулсираше во ритамот на спомените и новите моменти што се создаваа пред очите на публиката. Енергијата беше искрена, топла и моќна – токму онаква каква што може да ја создаде само фестивал што триесет години расте заедно со својата публика.

Импресиите по завршувањето беа едногласни – ова не беше обична фестивалска вечер, туку емотивно патување низ времето, вечер во која „Си-До“ уште еднаш покажа зошто останува симбол на детската музика, љубовта кон песната и најубавите спомени на многу генерации.

„СИ-ДО“ не е само фестивал.
„СИ-ДО“ е детство.
„СИ-ДО“ е спомен.
„СИ-ДО“ е традиција која трае и ќе трае.

Со гордост кон минатото и со поглед кон иднината продолжуваме да создаваме нови музички приказни.