„Внимавајте што јадат и со што си играат децата“: Д-р Бојана Силјановска Новачкова со апел до родителите

Една секунда невнимание е доволна за едно мало дете да се најде во животозагрозувачка ситуација.

Токму таков случај неодамна беше во рацете на д-р Бојана Силјановска Новачкова, која како специјалист по оториноларингологија и бронхоскопист во ЈЗУ УК за респираторни заболувања кај децата – Козле, со успешна интервенција го спаси животот на едногодишното дете кое вдишало кикирика.

„Вдишувањето на храна или друго туѓо тело во дишните патишта е сериозна и потенцијално животозагрозувачка состојба која, за жал, може да се случи за само неколку секунди и доколку не се интервенира на време да има фатален исход“ – предупредува д-р Силјановска Новачкова за Фемина.

Таа посочува дека особено внимание е потребно кај малите деца, особено до 3-годишна возраст, бидејќи нивниот механизам за безбедно џвакање и голтање сè уште не е целосно развиен, а децата природно го истражуваат светот и со устата.

„При јадење, детето треба да биде седнато и под надзор на возрасен, а храната да биде соодветно подготвена и прилагодена на возраста. Не дозволувајте детето да јаде додека трча, игра, лежи или да зборува со полна уста“ – апелира докторката.

Меѓу намирниците на кои родителите треба да внимаваат се јаткастите плодови, како кикирики, сончоглед, лешници, бадеми и леблебии, но и пуканки, цели зрна грозје, тврди бонбони, парчиња месо, тврди парчиња суров зеленчук, како и мешункасти производи (грав, леќа, ориз). 

„Посебно е сериозно инхалирање на вегетабилни туѓи тела кои лесно набабруваат и прават дополнителна опструкција, како и реакција на слузницата на дишните патишта“ – додава таа.

Но, опасноста не доаѓа само од храната. Мали делови од играчки, ситни коцки, мониста, монети, батерии, магнети и други предмети исто така можат да завршат во дишните патишта.

„Родителите треба редовно да ја проверуваат околината во која престојува детето и да ги отстранат сите предмети кои може да ги стави во уста. Играчките треба да бидат соодветни на возраста и без лесно одвојливи мали делови“ – советува д-р Силјановска Новачкова.

Доколку детето ненадејно се загуши, започне силно да кашла, отежнато дише, се појави свирење при дишењето или нагло посинување на кожата, потребно е веднаш да се побара итна медицинска помош.

„Важно е да се знае дека по вдишување на туѓо тело, детето понекогаш може привремено да престане да кашла или симптомите да бидат релативно благи, а туѓото тело сепак да остане во дишните патишта. Бронхоскопијата е основна метода за детектирање и отстранување на туѓи тела од долните дишни патишта“ – советува д-р Бојана и порачува дека превенцијата е најважниот чекор.

„Не можеме секогаш да предвидиме што ќе направи едно мало дете, но можеме да создадеме побезбедна средина околу него. Една мала навика – детето да јаде мирно, да биде под надзор и да нема достапни ситни предмети – може да спречи голема трагедија. Да бидеме внимателни. Да ги заштитиме нашите деца“ – додава таа.

Даница Караташова Илиоска / Femina.mk