Емотивно видео создадено во чест на талентираниот актер Робин Вилијамс ќе ви ги насолзи очите. 4-минутната компилација од сцени на Вилијамс покажува колку многу неговиот карактер, ведрина и заразна насмевка недостигаат во светот на филмот и пренесува силна порака.
Видеото „sunrise“ започнува весело, а продолжува со зборовите на Вилијамс: „Јас сè уште постојам, јас сè уште постојам“.
Потоа следува дел од говор на Вилијамс од филмот „Џек“, во кој актерот вели: „Те молам, не се грижи толку многу. На крајот на краиштата, никој од нас нема да живее долго на Земјата. Животот лета. И ако некогаш си вознемирен, погледни кон летното небо кога ѕвездите се нанижани низ ноќта. И кога ѕвезда која паѓа ќе светне од темнината, претворајќи ја ноќта во ден... посакај нешто и помисли на мене. Направи го твојот живот спектакуларен, знам дека јас го направив мојот“.
„Посакувам да беше сè уште тука. Толку многу си сакан и толку многу ни недостигаш. Се надевам дека твоето големо, големо срце патува со брзина на светлината како што отсекогаш правело. Донесе многу среќа во мојот живот. Ти благодарам за тоа. А за сите кои се борат со депресијата, сакам да им порачам да не се откажуваат. Ако се најдете на темно место, издржете и запомнете дека сте сакани и дека не сте сами. Секогаш постои надеж“ – пишува во описот на видеото.
Робин Вилијамс си го одзеде животот на 11 август 2014 година на 63-годишна возраст. Тој страдаше од тешка депресија, а непосредно пред смртта му беше дијагностицирана и рана фаза на Паркинсонова болест.