Кира Најтли е лицето од новата рекламна кампања на Шанел. Овој пат славната актерка влезе во улога на пејачка и преку изведбата на романтична, француска песна ја претстави новата колекција накит - Chanel’s Coco Crush.
Најтли ја пее песната „Le Tourbillon de la Vie“ од францускиот филм „Jules et Jim“ од 1962 година, а својата нежна вокална изведба ја придружува со гитара. Притоа, во фокусот се нејзините раце украсени со парчиња елегантен накит од најновата колекција на францускиот бренд.
Британската актерка е муза на Шанел веќе десет години, а минатата година познатиот бренд за првпат ја назначи и за заштитно лице на својот накит. „Карл Лагерфелд е икона. Благодарна сум и се чувствувам неизмерно среќна поради фактот што работам за Карл и за Шанел веќе девет години“ – беше тогашната изјава на актерката, а таа со последното рекламно видео уште еднаш докажа дека францускиот бренд не погрешил во својот избор.
Претходно, 32-годишната Најтли беше во рекламата за парфемот „Coco Mademoiselle“, а ја одглуми и легендарната Коко Шанел во краткиот филм „Once Upon A Time…“, кој го режираше самиот Карл Лагерфелд.