Сара Мејс создаде нова музичка приказна, хит кој лесно влегува во уши, а тешко се заборава.
Емотивната и енергична песна „Убав е“ е авторско дело на Сара (музика и текст), за аранжманот се погрижи Роберт Билбилов кој внесе заразен диско ритам. Видеоспотот е снимен на плажи во Грција и во Скопје. „Апсолутно, ова не е само песна која ќе се пее, туку и песна која ќе се почувствува, а многумина и ќе ги подзамисли“ - велат од тимот.
Љубовта, како вечно актуелна тема, често комплицирана, но секогаш длабоко човечка – е главниот лик во оваа музичка приказна. Ова не е само песна за него, ова е песна и за неа. Сара, преку својот препознатлив стил, длабока емоција и уметничка елеганција, ја раскажува приказната на една жена што се преиспитува и се „бори“ со себе.
„Да нема сонце, ќе можам. Да нема вода, ќе можам. Да немам никој, ќе можам. Но, без него не можам“...
Спотот како визуелна бајка, плажа, морско синило, зајдисонце и специфичната, ненаметлива женственост што Сара природно ја носи, идеално ја надополнува целата музичка приказна.
За летните и провокативни „стајлинзи“ на Сара се погрижи Фросина ФРАН Ангеловска, исто како и за нејзината шминка, а фризурите се дело на HairHouse.
