Трогателно: Мајка делфин со денови го носеше со себе своето мртво малечко, претходно изгуби и 4 други делфинчиња
Мајка делфин од Западна Австралија го трогна светот откако со денови го носеше телото на своето мртво младенче. Ваквото однесување научниците го поврзуваат со процесот на тагување.
Станува збор за делфинката Фрегл, која го изгуби своето делфинче старо 2 недели. Таа претходно се соочила и со смртта на четири други младенчиња.
Истражувачите од австралиската организација Geographe Marine Research со дрон ја снимиле нејзината потресна борба да не се раздели од своето бебе. Според нив, младенчето уште од раѓање имало забрзано дишење, што било знак дека шансите за преживување се многу мали.
Снимките покажуваат дека Фрегл со денови го носеше своето малечко низ водите, додека останатите делфини од јатото постојано биле околу неа, како да ѝ даваа поддршка во најтешките моменти.
Научниците објаснуваат дека ваквото однесување е забележано и кај други делфини и китови.
Мајките често со денови ги носат своите мртви младенчиња пред конечно да ги пуштат, бидејќи на крајот мора да почнат повторно да се хранат и да продолжат да живеат.
Иако никој не може со сигурност да каже што чувствуваат животните, експертите сметаат дека овие сцени се силен показател дека делфините доживуваат емоции кои многу наликуваат на човечката тага.