Македонската јавност е потресена од трагичната загуба на уште еден живот од пожарот во Кочани. Почина Владимир Блажев – Панчо од дуото ДНК.
Популарниот пејач настапуваше вечерта кога избувна пожарот во дискотеката „Пулс“ и штом го забележа пламенот и чадот, на микрофонот ги советуваше сите да излезат надвор.
Иако имаше информации дека неговата состојба е подобрена, за жал, тој не успеа да преживее.
Панчо беше татко на две деца - Андреја и Марјан.
Во пожарот во Кочани згаснаа животите на речиси сите членови на ДНК - пејачот Андреј Ѓорѓиески, клавијатуристот Филип Стевановски, гитаристот Александар Коларов, тапанарот Ѓорги Ѓоргиев, придружниот вокал Сара Пројковска, бит-боксерот Мартин Атанасовски (Буцо), тонецот Игор Велков и фотографот Александар Ефремов.
Панчо и Андреј повеќе од две децении ја забавуваа публиката и нижеа хит по хит. Тие ја основаа групата ДНК во 2002 година и оттогаш имаа издадено 3 студиски албуми, една „best of“ компилација и едно EP.