„Тоа што не ве убива, ве прави посилни“: Србинка со ампутирана нога се врати на кошаркарскиот терен

„Можете да остварите сè што ќе посакате“ – ова е пораката на Наташа Ковачевиќ, инспиративната српска кошаркарка, која не дозволува ампутираната нога да ја спречи во реализирањето на своите најголеми соништа.

21-годишната Србинка се врати на теренот две години по несреќата и стана првата личност со инвалидитет во Европа која професионално игра кошарка. Минатата седмица, Наташа го одигра својот прв натпревар со екипата на Црвена Ѕвезда.

На Ковачевиќ ѝ била ампутирана ногата од коленото надолу во септември 2013 година. Таа доживеала тешка сообраќајна несреќа во Унгарија додека патувала со автобус.

И покрај тоа, младата спортистка, која пред сообраќајката настапувала во повеќе репрезентативни селекции на Србија, не го изгубила својот ентузијазам и надежта дека еден ден повторно ќе се врати на теренот.

Со помош на спортска протеза, Наташа напорно тренирала, туркајќи ги препреките кои ѝ стоеле пред целта. Нејзиниот камбек бил дочекан со силен аплауз.

По натпреварот, Ковачевиќ со насмевка на лицето им порача на сите да не се откажуваат и да се борат за своите соништа. Мотото на Наташа е: „Она што не те убива, те прави посилен“ и таа е пример дека и по тежок момент во животот треба да го живееме секој ден во целата негова убавина.