Тарик и Лејла Филиповиќ учествуваа во панел-дискусиите на првата регионална конференција за родителството под покровителство на Becutan која се одржа во Скопје. Славниот пар пленеше со непосредноста, искреноста и шармантното презентирање на гледиштата за растењето и воспитувањето на децата.
Популарниот водител беше панелист во „Тато е херој“, сегментот посветен на татковството и улогата на мажите во грижата за малите и нивното обликување како личности. Додека неговата сопруга со насмевка го следеше од публиката, тој раскажа како откри за бременоста и се наврати на самите моменти на раѓањето на помалиот син кои лично ги снимал со камера.
Ние тоа некако го чекавме, чекавме, чекавме, па не се случи, па го оплакавме, па пак го чекавме и еден ден ѝ реков на сопругата дека ќе престанам да пушам денот кога ќе покаже тест дека е бремена. И таа ми рече ‘Еј, знаеш што е ново, утре ќе престанеш да пушиш’. Јас одма извикав ‘јееее’ и клекнав пред неа, зашто сум комбинација од типична риба во хороскоп и Босанец. Се разбира, не престанав да пушам... Требаше да се чести, па кога се роди детето, пак мораше да се чести.
Мислам дека постои период во животот „пред“ и „по“ дете, бидејќи тоа е потполно остварување како човек. Претходно, како што велат луѓето, ти фали нешто. Значи не ти фали љубов, не ти фали ништо, туку она што е тешко да се објасни. Кога ќе имаш дете, и срцето ти е полно и душата ти е полна и едноставно си остварен како човек. И тогаш почнуваат грижите и сфаќаш дека си бил безгрижен пред да добиеш дете.
Кога нашиот помал син се раѓаше, отидов во родилиштето и беше она „сака, не сака, може ќе трае малку подолго“ и бабицата ми рече „Оооо, таквите како тебе, паѓаат во несвест“. Ѝ реков „Нема шанси, ќе видиш“. Јас цело време бев тука, асистирав, со една рака снимав, во паузите одев да ги забавувам другите жени кои се породуваа. На самиот чин, со една рака ја држев, со другата снимав со камерата, синот излегува, јас снимам ама онака естетски да се гледа само над колена, па ножици во рака и ја сечам папочната врвца. Тогаш доаѓа Бенетон фотографија. Малиот беше виолетов, јас црвен, а Лејла беше жолта. Значи Бенетон ни беше спонзор.
За улогата на мајката во животот на секое дете, тој низ насмевка рече:
Мајка е мајка... Кога си паднал и си рекол ‘Тато’? Никогаш.
Имам признаено дека сум чирак, добар чирак и навистина учев со сопругата како и што. Кај мене имаше малку поголем страв, кај неа, како и кај секоја мајка, сè беше поприродно.
Сумирајќи го своето искуство како татко, неговиот совет за оние кои размислуваат за оформување на семејство е:
Да знаев дека е толку убаво, порано ќе се оженев. Сè се менува само на подобро. Се разбира, ако се подредат коцките како што треба, ако си со вистинската личност и ако размислуваш здраво. Би ги советувал да влезат во брак и родителство, ако срцето им е исполнето како што мене ми било и ден-денес ми е, а сè останато ќе се нареди.
Тарик и Лејла се во брак 16 години и се родители на 16-годишниот Арман. Убавата Хрватка има и 21-годишен син од претходен брак, кој славниот водител на „Милионер“ го прифати како свој.
Конференцијата „Родителството некогаш и денес“ беше посветена на сите деликатни теми и важни предизвици со кои се соочуваат родителите, а дискутираа јавни лица од Македонија и од регионот и експерти од повеќе сфери поврзани со детскиот развој.
Фото: Ерина Богоева / Femina.mk