Принцезата Кетрин со префинет стил освојуваше за време на одбележувањето на Денот на Анзак во Лондон.
44-годишната припадничка на британското кралско семејство без принцот Вилијам присуствуваше на значајниот настан во чест на загинатите војници од Австралија и Нов Зеланд.
Облечена во елегантно тегет палто со нагласени раменици од модната куќа Живанши, дизајнирано од Сара Бартон, Кетрин го задржа својот препознатлив класичен стил. Целосниот стајлинг таа го надополни со темносини салонки и впечатлива шапка со машна од Џејн Тејлор.
Многумина посочија дека со креацијата Кетрин потсетува на изглед на принцезата Дијана од 1995 година.
Накитот на Кетрин привлече особено внимание. Принцезата носеше впечатлив ѓердан кој ѝ е подарок од Вилијам, а истиот го комбинираше со обетки кои ѝ припаѓале на покојната принцеза Дијана.
Станува збор за сафирни обетки со дијаманти, дел од препознатливата колекција на Дијана, кои таа ги носеше во неколку историски моменти, вклучително и на гала-вечерата во Белата куќа во 1985 година, на која танцуваше со актерот Џон Траволта.
За овој момент, Траволта има изјавено:
„Не знаев дека треба да танцувам со неа сè додека не стигнав таму. Таа го држеше тоа во тајност кога ме запозна. Не знаеше дека Ненси Реган сè уште не ми кажала дека тоа е планот, дека јас сум ‘принцот на вечерта’“.
Дијана ги носеше обетките и на Мет балот во 1996 година.
