Стево Пендаровски и Елизабета Ѓеоргиевска елегантни на прием организиран од Џо и Џил Бајден

Стево Пендаровски и Елизабета Ѓеоргиевска позираа со Џо и Џил Бајден во музејот на уметноста „Метрополитен“ во Њујорк.

На приемот организиран од американскиот претседател за шефовите на држави во рамки на 78. Генерално Собрание на Обединетите Нации во Њујорк, македонскиот Претседател и нашата Прва дама изгледаа елегантно. Елизабета носеше бордо креација, додека Стево избра класичен костум.

И Џил изгледаше префинето во бел фустан со златни детали додека позираше со Џо, кој одржа свој говор.

„Повторно сме собрани во ходниците на историјата, а целиот свет чека на нас да водиме, да си покажеме дека сме достојни, да си покажеме дека сме способни да се здружиме за да ги совладаме предизвиците на нашето време.“

„Како и нашите предци, се соочуваме со голема пресвртница. Момент кога се тестирани основните принципи на суверенитетот, територијалниот интегритет и унверзалните човекови права.“

„Дали ќе го направиме она што мора да се направи за да се одговори на овие предизвици? Дали ќе го исполниме верувањето што си го дадовме себеси, на другите и на генерациите што доаѓаат. Може да има само еден одговор на тие прашања: Мораме“ – рече американскиот претседател.

Претходно, првите дами на двете држави се сретнаа и разговараа за менталното здравје кај младите.

„Во рамките на Генералното собрание на ОН и #SDGs неделата на активности и заложби, средбата со Џил Бајден е секогаш извонредна прилика да размениме искуства за иднината на младите и особено нивната едукација.“

„Споделив со неа низа на активности кои ги реализиравме со @unicefmk за менталното здравје кај младите и потребата од поголема грижа во овој дел од сите чинители.“

„Младите девојки и момчиња се нашата иднина, а нивниот оптимизам е клучен и за иднината на државата и општеството и за остварување на Целите за одржлив развој“ – напиша македонската прва дама.