Тамара Вучиќ во улога на покровителка присуствуваше на ревијата „Јованка во боја“, која се одржа во Палатата Србија во Белград.
Српската прва дама одржа краток говор пред почетокот на модното шоу, на кое беа претставени креации инспирирани од ликот и делото на некогашната југословенска прва дама Јованка Броз.
Говорејќи за сопругата на Јосип Броз-Тито, Тамара рече: „Секогаш во сенка на својот сопруг, умееше да ја претвори таа сенка во сцена паралелна на онаа на која неприкосновено владееше нејзиниот сопруг. Пленеше со својата појава, привлекувајќи внимание со широката насмевка и внимателно избраните комбинации. Тие комбинации секогаш беа изработени од висококвалитетни материјали, кои вечерва ќе ги видиме на сцената во ново руво. Фустанот кој и самата го носам настана од ткаенина која г-ѓа Броз ја добила најверојатно за време на посета на Египет.“
Сребрената креација, која Тамара ја искомбинира со елегантни салонки со блескави детали и едноставна брановидна фризура, е дело на Игор Тодоровиќ.
На ревијата во рамките на Белградската модна недела, беа презентирани креации на 22 дизајнери од регионот, а од нашата држава со импресивни креации се претставија Лидија Георгиева и „Завар Дизајн“. По завршувањето на шоуто, гостите го насочија вниманието кон изложбата на аутфити и модни додатоци од гардеробата на Броз.
Фото: Djordje Tomic