Новата кампања на „National Geographic“ цели да ни ги отвори очите и да нè натера да ја намалиме употребата на пластика.
Оваа иницијатива за покревање на свеста е насловена „Планета или пластика?“, а многумина ја опишуваат како генијална и моќна.
Познатото списание преку шокантни факти и информации ги пренесува застрашувачките последици од нашата зависност од пластика, а голем акцент е ставен на пластичниот отпад кој завршува во океаните.
Насловната страница привлече големо внимание, бидејќи најпрво на фотографијата изгледа како да е прикажана санта мраз, но тоа всушност е пластична кеса која плови во океан.
Списанието сподели и 10 шокантни факти:
- Повеќе од 5 трилиони парчиња пластика веќе пловат во нашите океани.
- Во светот, 73 проценти од ѓубрето на плажите е пластика: филтри од отпушоци, шишиња, капачиња од шишиња, обвивки од храна, кеси за пазарување и кутии за храна од полистирен.
- Светското производство на пластика експоненцијално се зголеми од 2,3 милиони тони во 1950, на 162 милиони тони во 1993, на 448 милиони тони во 2015 година.
- До 2050 година, речиси секој вид на морска птица на планетата ќе јаде пластика.
- Од 2015 година, генериран е пластичен отпад од над 6,9 милијарди тони. Околу 9 проценти од него е рециклиран, 12 проценти е согорен, а 79 проценти е акумулиран во депонии или се наоѓа во животната средина.
- Ширум светот, во секоја минута се продаваат речиси милиони пијалаци во пластични шишиња.
- Проценката за долготрајноста на пластиката се движи од 450 години до вечно.
- Најголемиот пазар за пластика денес се материјалите за пакување. Ѓубрето кое произлегува од тоа изнесува речиси половина од целиот пластичен отпад генериран на глобално ниво – поголемиот дел никогаш не се рециклираат или согоруваат.
- Околу 700 видови на морски животни досега имаат изедено или се имаат заробено во отпад од пластика.
- Повеќе од 40% од пластиката е употребена само еднаш и потоа фрлена.
