„Слабеењето не носи среќа“: Блогерка со моќна порака дека треба да се сакаме онакви какви што сме
Блогерка испраќа важна порака до сите оние кои на Нова година си ветија дека ќе ослабат.
„Слабеењето не носи среќа, изберете да се сакате себеси“ – порачува Сара Никол, која покажува како реално изгледа женското тело, без Фотошоп и лукави пози.
Мајката на четири деца објавува фотографии на кои се гледаат нејзините стрии, вишокот кожа и целулитот со цел да им помогне на своите следбеници да си ја зголемат самодовербата.
Во 2013 година, Никол тежела повеќе од 100 килограми, но со рестрикции успеала да си ја преполови тежината. Сепак, тоа не ѝ ја донесло посакуваната среќа. Таа е категорична дека е многу посреќна откако започна да се прифаќа себеси онаква каква што е.
Пред 10 години, по раѓањето на моето трето дете се вратив во мојот роден крај и тргнав во мисија да ослабам.
Подготвена бев да го „живеам животот во целост“ и да ја пронајдам среќата во себе која знаев дека чека да биде ослободена.
Намалив 45 килограми.
Бев сакана поради тоа, фалена и обожавана.
Го претставував тоа како успех, бидејќи чувствував дека го правам она што сите, а и самата јас, го сакавме за мене. Но, исто така чувствував неуспех.
Каде беше мојата среќа?
Уште повеќе ослабев за време на мојот развод. Започнав да си поставувам уште повеќе рестрикции. Ги игнорирав медицинските проблеми што ми се појавуваа, препишувајќи ги на стресот и прекумерното работење.
Истовремено, ги гледав профилите на другите жени кои поминаа низ слабеење, а како резултат НЕ пронајдоа среќа и се фрустрирав од нив. Претпоставувам дека мојата самоомраза ме исполни. Посакував да престанат да ми го кажуваат она што веројатно требаше да го слушнам.
На крајот, се соочив дека:
Не бев среќна.
Се залажував себеси и другите.
Имав нарушување во исхраната.
Имав голем проблем да го прифатам моето тело.
Бев исплашена.
Само сакав да бидам прифатена.
Сакав да го вклопам моето тело во стандарди со кои не можеше да биде во тек.
Се навратив на луѓето кои зборуваа за самоприфаќање и полека започнав да им верувам.
Дека среќата не доаѓа од бројките. Ниту од оние на моите панталони, ниту од оние на вагата, ниту од бројот на луѓе кои ме следат поради моите трикови и совети за слабеење.
Започнав да се чувствувам побезбедно во моето тело.
Анксиозноста кога излегував во јавност ми се намали.
Едноставно, започнав да се менувам.
Сфатив дека среќата не доаѓа од изгледот на моето тело, туку од тоа дали живеам во целост.
Во друг пост, Никол пишува:
Најтешкиот дел од слабеењето за мене не беше намалувањето на килограмите. Тоа беше суровата реалност дека слабеењето не ми го даде она што го очекував:
Не ме направи среќна.
Не ме направи задоволна со моето тело.
Не ме направи самоуверена.
Не ми даде чувство на поголема вредност.
Први јануари нема да промени ништо, освен тоа што е уште еден ден да изберете љубов. Уште еден ден да живеете во ОВА тело.
