Селин Дион никогаш не криела дека нејзиниот покоен сопруг Рене Анжелил e љубовта на нејзиниот живот, а неодамна откри дека тој бил и единствениот маж кој некогаш го бакнала.
Неговата смрт во јануари оваа година беше голем шок за 48-годишната пејачка, која два дена подоцна го изгуби и својот брат. И покрај огромните трагедии, Дион продолжи да настапува и речиси секој нејзин настап беше посветен на Рене.
„Разбрав дека мојата кариера беше на некој начин негово ремек-дело, негова песна, негова симфонија. Идејата да ја остави незавршена ужасно ќе го повредеше. Сфатив дека ако тој некогаш нè напушти, јас морам да продолжам без него, за него“ – објасни Дион за време на првото излегување на сцената по смртта на Анжелил, кој исто така беше и нејзин менаџер.
Вчера, славната музичка ѕвезда објави ретроспективно видео со нејзините најважни моменти од годината која измина и се разбира, Рене е составен дел од него.
Видеото започнува со снимки од погребот на Рене, а завршува со нејзина моќна изведба на „The Show Must Go On“.
„Мојот глас не одекнува без тебе. Ти ми ги исполни соништата од детството. Се надевам дека те инспирирав да посегнеш кон твоите“ – пишува на крајот на видеото.
Селин и Рене беа во брак 21 година пред тој да ја изгуби битката со ракот на грлото.