Неверојатно спасување: Бебе пронајдено живо 24 часа откако било закопано под земја во кафез за куче, таткото е осомничен

Неверојатно спасување на бебе се случи во американската сојузна држава Јужна Каролина.

Коа Шарп бил пронајден жив откако бил закопан во кафез за куче. Повеќе од 24 часа откако исчезнало, 11-месечното момче било спасено кога припадниците на полицијата и спасувачките екипи го слушнале неговиот плач под земјата.

Според информациите од локалните власти, осомничен е таткото на бебето, 25-годишниот Мајкл Комер. Момчето последен пат било видено со него во понеделникот, а во потрагата биле вклучени локални, државни и федерални служби.

Шерифот Џеј Кун соопшти дека Коа бил пронајден во жичен кафез за куче, завиткан во крпа и закопан во плитка дупка во близина на куќата на дедо му. Според проценките на истражителите, бебенцето поминало околу 24 часа под земја.

„Со Божја милост, крпата веројатно му обезбедила доволно воздух за да преживее“ – изјавил шерифот, објаснувајќи дека околу кафезот веројатно се создал воздушен простор кој му помогнал на бебето да остане живо.

Потрагата започнала откако членовите на семејството пријавиле дека Коа исчезнал. Мајката на осомничениот се грижела за бебето кога тој дошол во домот и таа го оставила во негова грижа. Се очекувало да пристигне уште една личност која требало да го чува, но кога пристигнала, таткото и бебето веќе ги немало.

Во понеделникот вечерта, Комер бил уапсен, но детето не било со него, па потрагата продолжила.

Во вторникот истражителите забележале свежо раскопана земја и растителен материјал во близина на шумски предел, недалеку од куќата на дедото на бебето. Кога почнале да копаат, го слушнале плачот на малото момче.

„Кога започнале да копаат, можеле да го слушнат малиот Коа како плаче. Можете да замислите, веднаш започнала трката да го извадат“ – раскажал шерифот.

Бебето веднаш било пренесено во болница, каде што добило медицинска помош. Шерифот изразил надеж дека целосно ќе закрепне.

Мајката на осомничениот рекла дека е шокирана од постапката за која е обвинет нејзиниот син и дека никогаш не очекувала нешто вакво од него, бидејќи тој претходно го имал чувано Коа без проблеми.
Мајкл е во притвор, а властите продолжуваат со истрагата за околностите на случајот и можни дополнителни обвиненија.

Мајката на Коа има целосно старателство над детето, но му дозволувала на Мајкл за време на викендите да се грижи за него.