Секоја чест: Медицински лица херојски ги штитеа новороденчињата за време на разорниот земјотрес во Колумбија
Во моментот кога силниот земјотрес со магнитуда од 7,4 ја потресе Колумбија, болниците и клиниките во погодените подрачја мораа итно да бидат евакуирани.
Додека владееше страв и неизвесност, медицинските сестри и лекарите не мислеа на себе, нивниот прв приоритет беа најранливите пациенти, новороденчињата.
Во Универзитетската болница „Ваље“ во Кали, медицинските сестри ги изнесоа бебињата од зградата и продолжија да се грижат за нив на улица. Тие останаа покрај нив и во хаосот по земјотресот, обезбедувајќи им сигурност додека траеше евакуацијата.
Слична сцена беше забележана и во клиника во Апартадо. Педијатарот Герман Андрес Сомојар, кој беше на смена во одделот за педијатрија, ги зеде новороденчињата во раце, ги завитка во ќебиња и ги изнесе од клиниката.
Фотографиите од утрото го покажуваат како стои на паркингот со две мали бебиња во прегратките, додека околу него се медицинскиот персонал и исплашените мајки.
„Децата секогаш се мој приоритет“ – раскажал докторот, кој покрај грижата за најмалите пациенти им помогнал и на две мајки кои од страв не можеле да се помрднат.
Токму овие сцени од улиците пред болниците станаа едни од најемотивните по земјотресот. Додека зградите се тресеа, а пациентите беа изнесувани на безбедно, медицинските работници останаа на своите позиции.
Без инкубатори, болнички кревети и сигурноста на болничките ѕидови, тие продолжија да ги штитат оние кои сами не можат да се заштитат.