Родителот ќе направи сè за да го види детето здраво и среќно.
Мајка од Македонија му донираше бубрег и му даде шанса за нов живот на своето дете кое има Алпортов синдром. Операцијата успешно била реализирана на Универзитетската клиника за урологија, а веста ја сподели министерот за здравство Сашо Клековски.
Трансплантацијата е една од трите трансплантации на бубрег кои неодамна биле изведени во земјава. Двајца пациенти добиле бубрег од починат дарител, додека третиот орган бил дониран од жив дарител, мајка која му подарила дел од себе на своето дете.
„Ви благодарам што дел од себе му подаривте на својот најблизок“ – напиша Клековски, упатувајќи благодарност до живиот дарител, но и до семејството на починатиот дарител кое во најтешкиот момент донело одлука да спаси животи.
Министерот ги посети пациентите на Универзитетската клиника за урологија, а на пациентите им посака брзо закрепнување и долг, квалитетен живот без дијализа.
Со последните три трансплантации, во Македонија годинава се изведени вкупно 15 трансплантации на бубрег.
До крајот на годината се планирани уште три трансплантации од жив дарител.
Клековски упати благодарност и до медицинските тимови – хирурзите, анестезиолозите, нефролозите и медицинските сестри кои учествувале во операциите, како и до сите кои ја координирале постапката за дарување органи.
„Дарувањето органи спасува животи. Еден починат дарител може да им помогне на повеќе пациенти. Многу наши сограѓани сè уште чекаат на листата за трансплантација“ – порача министерот.
Алпортовиот синдром е ретка наследна болест која ги зафаќа бубрезите, а може да предизвика и проблеми со слухот и видот. Кај дел од пациентите болеста постепено доведува до сериозно оштетување на бубрежната функција, поради што трансплантацијата може да биде животоспасувачка.