Милиони луѓе низ светот негуваат јавна љубовна афера со кафето. Неодоливата арома на топло кафе наутро ги буди нашите сетила и нè уверува дека станување од кревет не било залудно, додека секоја голтка нè исполнува со енергија и желба да го зграпчиме денот.
Независно дали сте вљубени во специфичниот вкус на еспресото, или сте заколнат приврзаник на капучиното, или пак, сте обожаватели на силното турско кафе, денес одбележете го Меѓународниот ден на кафето. Неофицијалниот празник треба да ве потсети да уживате во популарниот пијалак направен од кафеави зрна со силна арома и примамлив вкус.
Земјите кои го слават Меѓународниот ден на кафето најчесто на оваа дата го потсетуваат населението за долгата историја на пиење кафе и на важноста на чесната, етичка трговија со кафе. Делење на бесплатно кафе на 29 септември е практика на многу брендови.
Денес во никој случај не го прескокнувајте ритуалот на релаксирачко пиење на кафе, а притоа дозволете ѝ на секоја голтка да развиори динамичен танц во вашата уста.
