Раскошни цветови на црна основа: Славица Јанкуловска со ефектна креација на црвениот тепих на „Браќа Манаки“

Модата на свеченото отворање на „Браќа Манаки“ донесе различни толкувања на вечерната елеганција, а Славица Јанкуловска Цаци се издвои со артистична игра на црна силуета и раскошни цветни форми.

Дизајнерката, која студирала на Интернационалниот институт за мода „Изет Цури“, за фестивалската вечер избра долга црна креација со нагласени колкови, која својата експресивност ја доби преку богатата тридимензионална декорација.

Главниот визуелен акцент го создава композиција од волуменозни цветови во нежна жолта нијанса. Поставени асиметрично од горниот дел на креацијата кон половината, цветовите ја разбиваат строгоста на црната основа и внесуваат романтичност во силуетата.

Битолската дама дозволи креацијата да ја има главната улога, без да ја оптоварува со дополнителни модни детали. Црните обувки дискретно ја продолжија издолжената линија, а косата беше собрана во елегантна фризура со меки прамени околу лицето. 

На црвениот тепих Јанкуловска беше во придружба на нејзиниот добар пријател и ментор, дизајнерот Никола Ефтимов, за кого вели дека има огромно влијание врз нејзиниот творечки пат.

„Неговата креативност и професионализам се вистинска инспирација“, има потенцирано таа за Ефтимов.

Фото: Ивона Кочов, Александар Василевски / Femina.mk