Принцезата Кетрин прегрнува девојка болна од рак на првите фотографии по завршувањето со хемотерапиите

Принцезата Кетрин за првпат имаше јавна средба по завршувањето на своето лекување со хемотерапија.

Во замокот Виндзор, таа се сретна со 16-годишната Лиз, којашто исто така води борба со ракот. Принцезата од Велс ја прегрна младата девојка за да ѝ даде сила да не се откажува во битката за својот живот.

Лиз е надежна фотографка од Харогејт, која во јануари ја доби страшната дијагноза дека има дезмопластичен тумор на мали кружни клетки. Кетрин и принцот Вилијам ја поканија Лиз со семејството за да ја слушнат нејзината приказна и да ги дознаат нејзините амбиции да стане врвен фотограф.

Сопругата на принцот Вилијам во март сподели со јавноста дека ѝ бил дијагностициран рак по операција на стомакот, а минатиот месец таа изјави дека заврши со хемотерапијата.