Легендарната Џејн Гудол почина на 91-годишна возраст од природнa смрт, додека беше на турнеја со говори и предавања во Лос Анџелес.
Неуморната активистка, која се вбројува во најистакнатите приматолози и антрополози на светот, со својата работа остави трага што го промени начинот на кој светот гледа на природата, а зад себе остави син, внуци и милиони обожаватели ширум планетата.
Но, покрај своите научни трудови и глобални иницијативи, Гудол зад себе остави и еден необичен, но длабоко личен симбол – плишано мајмунче кое речиси никогаш не го испушташе од раце.
Приказната за Г-дин Х.
Познато како Г-дин Х., плишаното мајмунче ја следеше Гудол на патувања низ повеќе од 65 земји. Таа често велеше дека токму тоа ѝ било потсетник дека ништо во животот не е невозможно.
Мајмунчето ѝ било подарок од нејзиниот пријател Гери Хаун, поранешен маринец кој ослепел по хеликоптерска несреќа на само 21 година. И покрај хендикепот, тој станал успешен магионичар, се искачил на Килиманџаро и скокал со падобран, инспирирајќи ја Гудол со својата храброст.
„Гери настапува пред деца и дури на крајот им кажува дека е слеп, тие едноставно не можат да поверуваат“, изјави Гудол во едно од своите последни видеа.
Многумина веруваа дека Г-дин Х. е шимпанзо, симбол на нејзината животна мисија. Но, Гудол објаснуваше дека тоа е мајмун, а не шимпанзо, затоа што има опашка. „Гери мислел дека ми подарува шимпанзо, додека не му покажав дека има опашка“, појасни таа низ смеа.
Иако постои само еден вистински Г-дин Х., Институтот „Џејн Гудол“ нуди „Mr. H Junior“, плишано мајмунче преку кое секој може да ја пренесе пораката за надеж и мир што Гудол ја ширеше во целиот свој живот.
