Претседателот Стево Пендаровски и Првата дама Елизабета на проекција на „Медена земја“ покрај Атиџе
Стево Пендаровски организираше специјално прикажување на македонскиот документарен филм „Медена земја“ во Сули ан во Скопје.
Пендаровски и неговата сопруга Елизабета од првиот ред го проследија филмот, кој е македонски кандидат за Оскар.
56-годишниот Претседател и 47-годишната Прва дама на Северна Македонија седеа покрај Атиџе Муратова, која ја има главната улога во филмот.
„Медена земја“ не е филм за мед и не носи слатка порака. Таа е освестувачка и бара да размислиме како се однесуваме кон животната средина, како влијаеме на балансот кој го прави природата и колку на сметка на конзумеристичкото однесување често забораваме дека земјата е нашиот прастар родител, колку ние ќе се грижиме за неа, така таа ќе ни врати назад. Квалитетните уметнички и културни продукти кои доаѓаат од нашата земја придонесуваат за наша промоција и афирмација во светот и затоа треба да бидат поддржани соодветно според надлежностите и можностите на секоја институција. Како претседател се залагам за еднакви можности за сите граѓани и се надевам дека ќе успеам постојано да давам простор и поддршка на креативниот потенцијал кај нас. Во пресрет на македонската премиера организиравме проекција на „Медена земја“ во Сули ан. Се надевам ќе го гледате и ќе си дозволите пораката на овој филм да ве насочи барем кон една промена за поголема грижа за природата“ – стои во пораката на Претседателот Пендаровски.
"Медена земја" носи освестувачка порака за нашиот однос кон природата и нарушувањето на балансот. Прекрасната енергија на Атиџе ја почувствувавме и во живо на неделната проекција во Сули ан на која бев домаќин. Со среќа во трката за Оскар #Honeyland pic.twitter.com/PcMNnOJRQC
— Stevo Pendarovski (@SPendarovski) August 27, 2019
„Медена земја“ раскажува приказна за Атиџе, последната жена-одгледувач на диви пчели во Европа, која живее сама со својата мајка во централна Македонија. Главна идеја на филмот е да се прикаже припадноста на човекот кон природата и нарушување на природната рамнотежа преку судир на два различни начина на искористување на земјините ресурси.
Филмот е во режија на Љубо Стефанов и Тамара Котевска, а продуцент е Атанас Георгиев.