Прегратка посилна од бурата: Приказна за две жени сред ужасното невреме во Скопје ќе ве разнежни

Неколку минути беа доволни Скопје да се најде во тотален хаос. Силниот ветер уриваше кровови, корнеше дрвја и носеше сè пред себе. Но, среде тој ужас и паника, на една обична автобуска станица се случи сцена која го запре времето.

Додека стихијата ги поместуваше од место, две жени го послушаа сопствениот инстинкт. Тие се прегрнаа силно и не се пуштија сè додека бурата не стивна, покажувајќи дека во најтемниот момент, најсилното засолниште го наоѓаме едни во други.

Сведок на случката беше Гаврило Миловановиќ, кој ја раскажа на социјалните мрежи.

Неверојатна сцена. Од прозор кон автобуска гледам како летаат чаршафи и кровови додека 2 жени во пластичната отворена чекална чекаат автобус. Ветрот почна буквално да ги треска од клупа и од земја како на филм од Хичкок. Од спротива за дрво се држи еден господин кој исто не може да им пристапи.

Стануваат госпоѓите некако обидувајќи се да си помогнат меѓусебно и одеднаш се гушнаа. 🫂 Така останаа цели 3 минути додека не заврши невремето. Фасцинантно е колку основното познавање од хемија и физика помага кога знаеш за тежа и оска и температура. но уште пофасцинантно е тоа што ова беше интуиција, емпатија, потреба од човечка гушка во најтешките мигови, космос, љубов, бог. Доказот  дека човек е најубав кога е заедно...