„Повторно се чувствувам како жена, а не како скршено дете“: Фитнес блогерка го победи ракот и сега инспирира на Instagram
Фитнес блогерка ќе ве инспирира да тренирате за да бидете здрави и ќе ви докаже дека помалиот број килограми не значат и подобар изглед.
На Лин Луис ѝ била дијагностицирана лимфома, кога таа имала само 26 години.
Сфаќајќи колку е важно здравјето и животот без болка, кои многумина ги потценуваат, Лин започнала редовно да тренира фитнес. Таа поминала низ многу промени, физички и ментално, и со секоја физичка активност која ја додавала во нејзиниот распоред, станувала сè посилна и посилна. Денес, инспирира и мотивира повеќе од 2,5 милиони лица да се стремат кон поздрав начин на живот.
„Отсекогаш бев физички активна. Моите родители имаа коњи и тие станаа голем дел од мојот живот. Бидејќи имаме многу снег во Шведска, започнав да се занимавам со сноубординг, но тоа траеше само кратко. Околу 2012-2013 година се запишав на фитнес со моја пријателка и тоа ми се допадна. Полека започнав да гледам резултати и напорната работа започна да ми се исплатува. Теговите ми го оформија телото. Отсекогаш бев слаба и ми беше тешко да си ја зголемам тежината, па бев пресреќна со резултатите. Токму резултатите ми го зголемија интересот за здравиот начин на живот. Започнав да разбирам како е сè поврзано – тоа што го јадеш, со начинот на кој тренираш и колку се одмараш“ - вели таа.
Светот на Лин се свртил наопаку кога во 2014 година ја добила ужасната дијагноза.
„Мојот рак беше агресивен и веќе следниот ден по дијагнозата започнав да примам хемотерапија. За време на терапијата, повторно живеев со моите родители, но воопшто не излегував од дома. Без слаба физички и многу спиев. Додека траеше тоа, бев уништена, во умот и во телото. Но, откако завршив со хемотерапијата и радијацијата, мојот начин на размислување целосно се промени. Не се сожалував себеси, туку продолжив да живеам. Се сеќавам дека ќе си ја ставев периката од која ужасно ме чешаше и ќе одев во фитнес сала. Тоа е нешто со коешто се гордеам“ - раскажува младата девојка.
Во последните шест години, Лин ја покачи својата тежина за повеќе од 10 килограми, но таа вели дека е пресреќна поради тоа.
„Ги обожавам моите нови килограми. Секогаш се сметав себеси за слаба и изгледав болно. Сега лицето ми сјае и имам облини. Повторно се чувствувам како жена, а не како скршено дете.“
„Сакам да ги инспирирам другите кои се соочуваат со каква било болест или пак кои сакаат да го направат следниот чекор кон здрав начин на живот. Фитнесот е голема индустрија денес, со огромен фокус на совршениот изглед. Иако 80% од оваа индустрија е фокусирана на слабеењето, мојата мисија е светот да разбере како да добие тежина на здрав начин“ – вели таа.
