„Поубаво нешто немам видено“: Топол поздрав на полуматуранти и првачиња во училиште во Скопје
Од основното училиште „Његош“ – Јурумлери во Скопје објавија емотивно видео од топол поздрав помеѓу полуматурантите и идните првачиња, кое инстантно стана хит.
Учениците кои годинава ја слават својата полуматура и го завршуваат деветгодишното образование на прекрасен начин го заокружија својот престој во училишните клупи. Тие симболично се поздравија со идните првачиња, малите дечиња кои од септември за првпат ќе седнат во истите тие клупи и ќе го започнат своето образовно патување.
„Кругот на животот“ – стои во описот на видеозаписот од овој потег, кој доби многу комплименти на социјалните мрежи.
„Поубаво нешто немам видено, респект за идејата“, „Смена на генерации, емотивно. Среќно на големите во светот на големите и среќно на малите во нови предизвици и раснење во големи луѓе“ и „Браво, преубаво видео полно емоции“ – се дел од коментарите на социјалните мрежи.
Видеото брзо стана вирално токму поради својата едноставна, но силна порака.
Додека полуматурантите со кренати глави и нови соништа чекорат кон средношколските денови, зад себе оставаат прекрасен пример за тоа како се пречекуваат новите генерации.