Потег за аплауз: ФФМ обезбеди бесплатен влез за деца ученици со родители на натпреварот Македонија – Казахстан
Фудбалската федерација на Македонија соопшти дека на денешниот натпревар Македонија – Казахстан влезот на источната трибина ќе биде бесплатен за сите ученици од основните училишта придружувани од родител.
Дополнително, тука ќе можат да влезат и младите фудбалери придружувани од своите тренери од Детска лига, фудбалските школи од регионалните лиги и сите млади категории во системот на натпреварување на ФФМ.
Потегот веднаш наиде на позитивни коментари и пофалби што им се дава можност на најмладите одблизу да ја доживеат атмосферата и да ги бодрат своите фудбалски херои.
Еве го соопштението на ФФМ:
Ги повикуваме навивачите да пристигнат најдоцна еден час пред почетокот на натпреварот и да ги заземат своите места навреме.
Препорачуваме пристигнување пеш или со јавен превоз, бидејќи паркирањето околу Арената ќе биде ограничено (освен за акредитирани возила).
Лица од eticket.ffm.com.mk ќе ги проверуваат билетите, а вие порано подгответе се за проверка.
Забрането е внесување чадори, големи торби, шишиња, запалки, пиротехнички средства, знамиња и транспаренти со несоодветна содржина.
Влезот е бесплатен на источната трибина за младите фудбалери придружувани од своите тренери од Детска лига, фудбалските школи од регионалните лиги и сите млади категории во системот на натпреварување на ФФМ.
Исто така, влезот на источната трибина е бесплатен за сите ученици придружувани од својот родител од основните училишта.
Натпреварот меѓу Македонија и Казахстан започнува во 20:45 часот.