„Поминав 10 години без дијагноза“: Ќерката на „ловецот на крокодили“ за борбата со невидливата болест ендометриоза

Бинди Ирвин има мисија да ја подигне свеста кај луѓето за ендометриозата, „невидливата болест“ од која таа страдала 10 години пред да добие точна дијагноза.

Ќерката на легендарниот „ловец на крокодили“, Стив Ирвин, си ја отвори душата и проговори за долгата и болна битка со оваа состојба која ѝ го променила животот.

Во емотивна објава, Бинди пред неколку дена откри дека во последните три години ѝ биле отстранети повеќе од 50 лезии од телото, а поминала и низ апендектомија и операција на хернија.

Во последните три години ми беа отстранети повеќе од 50 лезии од ендометриоза од моето тело. Ми беше отстранета и „чоколадна“ циста која го залепила мојот јајник за ѕидот на телото. Поминав низ апендектомија и операција на хернија. Почувствував неопислива и неизбежна болка. Се обидував да ја чувам мојата невидлива болест за себе, откако лекарите ми велеа дека тоа е „дел од тоа да си жена“. Поминав 10 години без дијагноза. Како тинејџерка и млада жена, се чувствував слабо и длабоко несигурно. Бев заробена во сопственото тело.

Март е месец за подигнување на свеста за ендометриозата. Додека овој месец се ближи кон крајот, ги повикувам сите да се сетат на оваа невидлива болест секој ден. Да покажеме поддршка, сочувство и разбирање кон милионите кои страдаат. Одговорноста е на сите нас да ја подигнеме свеста, не само за ендометриозата, туку и за женското здравје воопшто. Никој не заслужува да страда во тишина.

Ако чувствувате болка, срцето ми се крши за вас. Ви верувам. Ве молам, побарајте одговори. И не се откажувајте од себе. Знам колку е тоа тешко.

Смелата Австралијка, која сега е мајка на едно девојче, вели дека најтешкиот период ѝ бил кога морала да живее без точна дијагноза и поради тоа се чувствувала изгубено, несигурно и заробено во сопственото тело.

Таа сега ги охрабрува сите жени и девојки кои чувствуваат голема болка да бараат одговори и да не се откажуваат.