„Почнав да д'ткам од страв од наставничката“: Слаткар сподели искуства на фанови откако објави видео од дете кое пелтечи
Марко Маринковиќ – Слаткар сè поотворено зборува и се залага за подигнување на свеста за проблемот со кој се соочува од мали нозе – пелтечењето.
Откако сподели видео со 8-годишниот Иво, кој исто така пелтечи, до него пристигнаа бројни пораки од родители, наставници и лица кои лично се соочиле со оваа потешкотија во говорот.
„Јас сум Иво и јас пелтечам. Кога ќе ме прекинат, ми станува уште потешко. Мојот глас е важен... Слушни ме“ – вели 8-годишниот Иво во видеото.
Неговата мајка, пак, споделува: „Научив дека трпението е најголемата помош“.
Самиот Слаткар претходно отворено зборуваше за своето искуство со пелтечењето. Тој сподели дека уште како дете се соочувал со предрасуди и препреки, но дека со текот на годините успеал да ја претвори својата потешкотија во сила, а музиката во начин на комуникација.
Токму неговата искреност ги охрабри и другите да ги споделат своите приказни. Еве дел од пораките кои ги доби тој:
„Марче здраво. Живееме во Н. Лисиче и моето дете има 13 години и верувај нема ниедно другарче на негови години зошто сите к.. си играат со него зошто пелтечи. Го имитираат и буквално го исмеваат, едноставно се повлече и се дружи со многу повозрасни. Ама за тоа има мајка како мене која му е ветер во грбот за сè и да не се срами воопшто за својата состојба. Те имаме и тебе и твоите песни кои нон стоп си ги пееме и слушаме😉“
„Здраво, сестра ми д'тка. Душава ме боли, а најмногу од сè мене ме боли, а замисли како и било неа во 6-то одд. наставничка по Англиски јазик ја исмејуваше и ја викаше во секој клас да ја слушнете како зборува односно д'тка. Јас се пожалив кај директорот ама чабе. Македонска работа.... Поздрав те обожаваме и јас и син ми 6 години.“
„Се мислев дали да ти пишам, не за да бидам скриншот на стори, туку затоа што имам течно прозборено на неверојатни годинка и нешто ситно, за во прво одделение да почнам да д'ткам од страв од наставничката која трескаше со дневник на катедра, а јас седев во прва клупа. Денес и јас сум наставничка, и од тоа искуство знам дека таква наставничка никогаш нема да станам. Го препознавам секое дете со ваква и слична несигурност, и пробувам да му создадам безбеден простор да се искаже. Браво за сѐ што правиш 😊.“
„Секоја чест ХРАБАР човеку! Реченицава ми одекнува СЕКОЈ ден и не знам дали повеќе ме боли или ме разбудува. Третмани има, но недостижно скапи, ама се трудиме... Секој ден стравуваме од ‘етикети’, омаловажувања. Успешни луѓе како тебе се светла точка и елан да продолжиме со крената глава. Ти БЛАГОДАРАМ од 💖“
„И јас сум мајка на детенце што пелтечи од 3 годишна возраст, сега е 6 годинки и среќна сум што со помош на логопед знае во некои ситуации како да се исконтролира правилно да изговори 🙏🥹❣️“
„Браво, браво, браво!!!! многу ми е мило дека конечно некој зборува за ова, мојот помал брат пелтечи од мали години и најмногу ќе му значи❤️“).
Приказните на овие лица ни даваат до знаење колку силно може да влијае пелтечењето врз самодовербата и секојдневието на едно дете, особено кога наместо разбирање ќе наиде на потсмевање, прекинување или исмевање.