Почина хрватската блогерка Кристина само 4 месеци по трауматичното породување со 6-тото дете
Хрватската јавност ја потресе веста за ненадејната смрт на Кристина Ковачевиќ Хитрец.
Само четири месеци пред да почине, 38-годишната блогерка и авторка на „Мамин блог“ го роди своето шесто дете и јавно раскажа за драматичниот момент кој го доживеала за време на породувањето. Причината за нејзината смрт не е соопштена.
Кристина со години преку социјалните мрежи отворено зборуваше за мајчинството, семејството и секојдневните предизвици на животот со големо семејство. Нејзините објави ги следеа речиси од 50.000 лица на Instagram, а покрај блогерството, таа беше позната и по хуманитарната работа, за која ја доби наградата „Гордост на Хрватска“.
Смртта на Кристина беше потврдена и на нејзиниот Instagram профил, каде стои:
Драги пријатели, следбеници, познаници и сите што ја познававте нашата драга Кристина, со голема тага во срцето се простуваме од нашата Кристина.
Во овие тешки моменти, им благодариме на сите за изразеното сочувство, поддршката и за секое убаво сеќавање што го чувате за Кристина.
Нека ѝ е мирно небото.
Засекогаш ќе остане во срцата на сите кои ја сакаа. ❤️
Животот на Кристина не беше без предизвици. Таа отворено зборуваше дека се борела со неплодност пред да стане мајка на шест деца, како и за трауматичното породување со шестото дете.
Како што раскажа самата, по примањето на спинална анестезија одеднаш останала без воздух и воопшто не можела да вдиши, ниту да зборува.
„По спиналната анестезија одеднаш останав без воздух. Не тешко дишење, не паника... туку буквално не можев да вдишам ни милиметар воздух. Сè ми беше вкочането. Не можев да зборувам. Само мавтав со рацете обидувајќи се некому да му покажам што се случува“ – раскажала таа.
Кристина опиша дека медицинскиот тим ѝ ставил маска и ѝ велел да дише, но таа едноставно не можела.
„Во дел од секундата се помирив со тоа дека си одам. И она што најмногу ме шокираше... не беше паниката во тој последен момент. Туку мислата: ‘Добро... си одам... но барем не боли. А што ќе биде со бебето и со останатите деца?’ И тука се изгасив“ – споделила таа.
Иако во нејзината глава тој момент траел како цел живот, во реалноста станувало збор за секунди. Лекарите ја успале и ја интубирале, односно ѝ поставиле цевка за дишење и механички го презеле дишењето наместо неа. Благодарение на брзата реакција на медицинскиот тим, ситуацијата завршила добро.
Кристина решила јавно да го сподели искуството затоа што претходно не знаела дека вакво нешто може да се случи.
Таа објаснила дека во ретки случаи спиналната анестезија може да се прошири повисоко и да ги зафати нервите кои го контролираат дишењето, што може да доведе до чувство дека човек не може да вдише.
„Тоа е страшно искуство. Нема да лажам, едно од најлошите чувства што постојат. Но, постои решение. Лекарите знаат што прават. Реагираат брзо. И можат да те спасат, како што ме спасија мене“ – напишала Ковачевиќ Хитрец.
Причините за нејзината прерана смрт остануваат непотврдени, но на социјалните мрежи се шпекулира дека станувало збор за самоубиство.
