Почина Гордана Дувњак, нејзините синови скршени од болка: „Жена борец, мајка каква што секое дете само би можело да посака“
Почина македонската новинарка Гордана Дувњак.
Истакнатата новинарка и уредничка го напушти овој свет на 61-годишна возраст по долго боледување, оставајќи зад себе богата професионална кариера и длабока тага кај семејството, колегите и јавноста.
Веста за нејзината смрт ја потврди семејството, а нејзините синови Мартин и Стефан се простија од саканата „мајка, жена и кралица“ со емотивни пораки на социјалните мрежи.
💔💔💔💔
🕊️🤍Се одјави нашата мајка, жена, кралица Гордана Дувњак. 🖤
Жена која што не ја сакаше и почитуваше само тој што ја немаше запознаено. 🌹
Жена борец, мајка каква што секое дете само би можел да посака и да сонува да има. Најдобрата на светот! 🤍
Врвен професионалец и новинар кој беше пример за чесност, љубов кон професијата, искреност, владеење на материјата и став.
Мајка која што често знаеше да каже дека близнаците Мартин и Стефан и се најголемото богатство во животот и најголемата гордост и успех во животот. 🤍
За нас Гоцика златна ти беше и мајка и татко, со оглед дека тато го загубивме многу млади. Толку многу љубов, поддршка и жртва даде за нас да изведеш луѓе на животниот пат што никогаш нема да ти го заборавиме. 💔
Секогаш ќе те паметиме како најдобрата и најпосветена мајка, борец и жена лавица која гордо се соочуваше и се носеше со секој предизвик и потешкотија во животот. 🕊️
За жал, животот воопшто не искочи фер со таква прекраснотија и убавина од човек каква што секогаш ќе те паметиме и со полно срце, љубов и гордост ќе те спомнуваме. 🤍
Те сакаме и секогаш ќе те сакаме "наш липи анџеле". 🕊️✨
Наздравете со тато горе повторно заедно со по една жолта и чувајте нè со Стефан и нашите најблиски. 🕯️
Ние секогаш ќе ве спомнуваме и ќе се сеќаваме на вас со гордост какви прекрасни родители имавме. 🤍
Фамилија музичари, полни со љубов, поддршка и разбирање. 🙏
Погребот ќе се одржи утре, во 11 часот во капелата во Бутел, а во 12 часот погребот е закажан на гробиштата на Бутел. 🕊️ - стои во пораката на Мартин.
Нè напушти нашиот ангел и борец, мојата мајка. Целиот живот го посвети на мене и Мартин и беше најпрекрасниот човек на светот, толку добра, искрена, човечна и секогаш спремна да помогне и на тие што ги знае и оние што прв пат ќе ги запознаеше. Покрај мајка беше и мојот најдобар пријател, моето друштво за театар, кино, прошетка покрај Вардар, придружба за настани и секогаш се секираше само да ме види среќен и среден.
Ќе фалиш секогаш ангелу мој, чувајте нè со тато од горе заедно. Ќе ѝ раскажуваме на принцезата Срна, твојата внука, каква жена си била и колку се израдува кога ни дојде на свет. Почивај во мир без болки и стравови.
Телото ќе биде изложено утре на 22.04.2026 година во капела во 11 часот, а погребот на гробиштата Бутел од 12 часот.
💔💔💔😢😢😢😢 - стои во пораката на Стефан.
Дувњак ја започна кариерата во Македонската радио-телевизија во 1988 година, по што работеше во „Нова Македонија“, а најголем дел од професионалниот пат го помина во „Утрински весник“, каде беше препознатлива по аналитичкиот пристап и интервјуата со клучни личности од јавниот живот. Подоцна, таа беше дел од „Макфакс“, 1ТВ и „Фокус“, а од 2023 година ја извршуваше функцијата портпаролка на Судскиот совет.
Како долгогодишна членка на Здружението на новинарите на Македонија, Дувњак активно придонесуваше за унапредување на етичките стандарди и заштита на професионалните вредности во новинарството.
