По 45 години заедно: Сопругата на Оливер Драгојевиќ со емотивна порака се збогува со непреболениот пејач
Хрватска и целиот Балкан сè уште тагуваат по Оливер Драгојевиќ. Сопругата на хрватскиот музичар, кој пред десетина дена ја изгуби битката со ракот, преку емотивна порака се збогуваше со саканиот со кого помина 45 години од својот живот.
„Ти секогаш ќе бидеш капетан на нашиот брод и ќе нè возиш каде што треба и каде што ќе ни биде добро. Ќе нè чуваш како и досега, а ние ќе го пратиме твојот траг во бескрајот“ – пишува Весна Драгојевиќ.
Таа не пропушти и да им се заблагодари на сите за величественото испраќање на легендарниот пејач кон неговото вечно почивалиште.
Прочитајте ја нејзината целосна порака:
Најдраг мој! Знаеш дека за збогување никогаш не ги наоѓав вистинските зборови. Кога ни рекоа да се збогуваме со тебе, не знаев како се прави тоа, ниту што да кажам. Ти спиеше со денови, можеби не нè ни слушна. Знаеш дека бевме покрај тебе и можеби тоа беше доволно. Беше недела наутро, донесете му облека...
Која? Можеби онаа од последниот концерт во Арената, знаеш она одело кое го купивме во Австрија. Но, тоа сигурно не ти беше важно и тоа е првиот пат да не те прашам што ќе облечеш. По една година соочување со реалноста. Шок. И покрај тоа што ја знаевме ситуацијата.
Што сега, каде, како? Сите ни помогнаа. Ти три дена беше она што никогаш не сакаше да бидеш – важен, почитуван, сакан од сите познати и непознати луѓе. Јас знам што би ти рекла на тоа, па ми е срам да повторувам, но морам да ти кажам дека сè се случи спонтано, без притисок. Ние дома знаевме дека луѓето те сакаат, но бевме шокирани од количината на емоции кои ги доживеавме. Имаше, Оле, три погреби во два дена.
Едвај преживеавме, но бевме горди на сите случувања поврзани со тебе. Како што рече Џибони, ова море е само за тебе и тој ден и беше. Знаеш дека сме добро. За некој ден ќе се роди Марко, твојот шести внук кој никогаш нема да го видиш, но знаеше дека доаѓа.
Сите тие се многу мали за да сфатат што се случува. Малиот Тони ме праша: 'Бабо, зошто се сите овие свеќи пред нашата куќа?' Му реков дека луѓето ги оставаат бидејќи почина дедо. Знаеш што ми рече: 'зошто ги има толку многу'. Гледаш, за него и за сите нас ти беше само дедо и сигурна сум дека и ти би му го кажал тоа, а и така те доживувавме.
Добивме стотици, можеби и илјадници пораки за сочувство од твоите пријатели и колеги и непознати луѓе. Стотина бродови те испратија и сигурна сум дека ти би рекол: вие сите сте полуделе, како јас да сум некоја фаца, јас го правев само она што го сакам. Можеби и затоа имаше такво испраќање, бидејќи никогаш не се туркаше во првиот ред. Знаеш дека живеевме како целиот нормален свет, се дружевме со луѓе, а не со титули. Луѓето тоа го препознаваат и затоа те сакаат. За песните нема ни да зборувам, бидејќи никогаш не ни зборувавме. Ти беше наш маж, татко и дедо. Немој да се лутиш што те сакаа толку многу луѓе, а ти можеби и не ни знаеше а тоа.
Морав да го напишам ова поради сите оние кои те испратија, бидејќи не можам да им се заблагодарам на сите поединечно за ова што го приредија. Сакам да знаеш колку многу љубов имаше за тебе, која не може со ништо да се измери. Затоа уште еднаш ви благодарам на сите, тоа е сè што можам да речам, бидејќи не постојат вистински зборови. Ти знаеш колку те сакаме. Не ги слушавме баш многу твоите песни, но можеби сега ќе го правиме тоа, бидејќи што и да отвориме, ни се наметнуваат самите. Не грижи се за нас, знаеш колку се сакаме и тоа ти беше најголемата среќа во животот. Ти секогаш ќе бидеш капетан на нашиот брод и ќе нè возиш каде што треба и каде што ќе ни биде добро. Ќе нè чуваш како и досега, а ние ќе го пратиме твојот траг во бескрајот. Твојата Весна.
Весна и Оливер стапија во брак во 1974 година. Тие заедно имаат три сина.
