По 10 години борба со неплодност и 5 неуспешни ин витро обиди, 38-годишна жена забремени со тројка во „Плодност“
Надежта последна умира, а чуда се случуваат кога најмалку очекуваме.
По цели 10 години борба со неплодност, пет неуспешни ин витро обиди и многу поминати лавиринти, 38-годишна жена конечно ја доби најубавата вест во својот живот и тоа во трикратна доза.
Тимот на болница „Плодност“ со гордост сподели дека пациентката забремени со тројка по направеното шесто ин витро во животот.
Потешкотиите со зачнувањето брачниот пар ги имал поради тежок машки фактор.
Со цел да се заштити здравјето на мајката и да се осигура успешен крај на бременоста, докторите ја советуваа трудницата да направи редуцирање на едниот ембрион и да продолжи со близначка бременост.
ПО 10 ГОДИНИ БОРБА И 5 НЕУСПЕШНИ ИВФ ОБИДИ ТРОЈНО БИНГО ВО ПЛОДНОСТ!
По десет години борба со неплодност, 38-годишна пациентка денес ја доживеа најубавата вест, тројна бременост со уредна срцева акција кај сите три ембриони.
Причината за неплодноста беше тежок машки фактор. Пред да дојде во Болница Плодност, пациентката имаше три неуспешни ИВФ обиди во Германија. Следуваа уште два обиди во Плодност, при кои ембрионите беа хромозомски абнормални и не беше направен ембриотрансфер.
Но, тимот не се откажа.
Во шестиот ИВФ обид беа добиени три висококвалитетни ембриони, кои беа вратени, а резултатот беше тројна бременост.
Ултразвучниот преглед потврди три одделни гестациски вреќички и три уредни срцеви акции.
Поради ризиците што ги носи тројната бременост, по детална консултација со пациентката и во согласност со современите медицински препораки, беше донесена одлука за ембриоредукција со цел да се зголеми можноста за успешен исход на бременоста.
На идните родители им посакуваме мирна и уредна бременост.