Во изминативе четири дена Париз пулсираше во ритамот на високата мода. Префинетото мајсторство на врвните дизајнери беше презентирано пред љубопитните погледи на внимателно избрана публика. На пистите во градот на светлината манекенките наликуваа на самовилски кралици, божици од вселената, дами во цветна градина, меланхолични роматичарки во мрачна шума.
Што сè донесе Париз на модната сцена?
Версаче
Донатела Версаче докажа дека елеганцијата не е неопходна за високата мода, покажувајќи модернистичка колекција инспирирана од контрастот помеѓу „стаклото и челикот“, односно нивната „кршливост и цврстина“. Имагинативните мешавини на материјали (тул со латекс, лакирана кожа и кожа од питон), зачинети со детали од 24-каратно злато, придонесоа колекцијата да ја зачува драматичноста карактеристична за брендот Версаче.
На визуелниот спектакл не му недостигаше максимален луксуз, нити пак умерен сексапил.
Кристијан Диор
Духот на пролетта, расцутените цвеќиња и обновувањето ја исполнија со непоправлив оптимизам ревијата на Диор. Манекенките со кратки фризури и црвени блескави усни ги презентираа креациите на Раф Симонс во прекрасна раззеленета градина.
„Беше многу убаво, модерно, со релевантен приод кон високата мода. Иако тој искористи традиционални аспекти од Диор – пеплум, формите на џакетата, волуменот на здолништата и корсетите – сè беше направено на умерен начин“ – изјавила Александра Шулман, уредничката на британскиот „Вог“.
Џамбатиста Вали
Вали претстави традиционален и луксузен поглед на високата мода. Поигрувајќи си со должината и волуменот на здолништата и формата на фустаните, а притоа користејќи софистицирани материјали, италијанскиот дизајнер креираше колекција инспирирана од флората и фауната.
Дамска елеганција зрачеше од фустаните украсени со цветни детали, кои им даваа тродимензионален ефект.
Шанел
Птици пееја во меланхоличната дабова и борова шума на Шанел која беше олицетворение на летен ноќен сон. Мистериозната и романтична ревија, во која доминираа твид и чипка, на моменти делуваше театрално. Манекенките беа нашминкани во стил „птичји очи“ со помош на трепки изработени од органза, додека нивните асиметрични фризури беа украсени со пердуви кои изгледаа како паднати гранки во нивните коси.
Карл Лагерфелд на крајот го испрати на пистата своето кумче и две девојки облечени како невести кои се држеа за рака. На тој начин тој ја изрази својата поддршка за легализирање на браковите помеѓу лица од ист пол.
Џорџо Армани
Џорџо Армани донесе на пистата возбудлива турска авантура. 78-годишниот дизајнер, кој со луксузните креации редовно си го пробива патот до срцата на холивудските ѕвезди, им го отстапи централното место во ревијата на чистите панталони со метален отсјај.
Елечиња со мониста, впечатлив накит со етнички елементи, сјајна свила, сатен и органза ги красеа дамските креации со егзотични примеси.
Жан Пол Готје
„Сè се врти околу индиските цигани, оние вистинските од Раџастан“ – изјавил Готје пред почетокот на шоуто. При дефинирањето на визијата за колекцијата очигледно во неговата глава се вртела индиска невеста превезувана на слон.
Ревијата заврши со „невеста“ која го подигна здолништето за да открие сокриени дечиња облечени во индиски стил.
Валентино
Дизајнерското дуо Марија Грација Киури и Пјер Паоло Пичоли создаде бајковита колекција тргнувајќи од идејата за тајни градини со лавиринти, антички мозаици и романтични слики со цвеќиња. „Навистина сакавме да креираме сон“ – изјавила Киури, која доби честитки од самиот Валентино.
Првите фустани имаа интересен дезен кој имитираше железна порта како од бајките, која ја откри таинствената романтична градина „отсликана“ со секоја од наредните креации.
Ели Сааб
Ели Сааб ја маѓепса публиката со деликатна елеганција и самовилска нежност. Неговата „Ода на деликатноста“ не донесе голема инвентивност на пистата, но го следеше успешниот гламурозен рецепт по кој работи тој.
Пастелните нијанси беа разбиени од црвените и црни креации, додека рачно шиените кристали ѝ даваа раздвиженост на секоја креација.
