Донатела Версаче го означи стартот на Париската недела на високата мода. На гламурозната ревија 57-годишната дизајнерка претстави луксузна колекција за клиентите со најдлабок џеб.
За моделите пролет/лето 2013 Версаче црпела инспирација од архитектурата, или поточно од стаклото, железото и челикот во Le Centorial, зграда во срцето на Париз во која се одржа ревијата. „Целосно бев занесена од начинот на кој кршливоста на стаклото е во контраст со цврстината на масивната структура“ – изјавила таа.
Во визуелниот спектакл доминираа црната, златната и белата боја, како и неонското розово и жолто. Исклучително впечатливи беа златните детали кои се во јадрото на брендот Версаче.
Колекциите висока мода се олицетворение на ултимативниот луксуз. Така, златните ленти на креациите на Версаче се од вистинско 24-каратно злато, додека за изработка на белото крзнено палто биле неопходни 500 работни часа, што донекаде и ги оправдува безумно високите цени за претставените креации.
Ревијата ја отвори Кристен МекМенами. 46-годишната манекенка со седа коса носеше црн костум со цигара панталони и сако со златни детали.
Донатела Версаче
Во првиот ред на ревијата седеа принцезата Шарлин и славниот Кевин Костнер.
Принцезата Шарлин и Кевин Костнер
Четири дена Париз ќе биде домаќин на екстравагантни ревии со прескапи креации. Невестинските фустани достигнуваат цени и до 100.000 евра. Високата мода не е искуство кое може да го има секоја дизајнерска куќа. Само оние кои исполнуваат превисоки стандарди успеваат да ги пуштат манекенките во свои креации да продефилираат за време на Париската недела на високата мода.
