Упорноста секогаш се исплатува, а Лорен Вотсон е прекрасен пример за тоа. 34-годишната Австралијка, која е делумно парализирана од половината надолу, успеала да го порази својот хендикеп за да стане акробат во воздух. Сега таа настапува пред публика, не дозволувајќи ништо да ѝ застане на патот.
Вотсон имала само 19 години кога доживеала сообраќајна несреќа. Поради повредите на 'рбетот, таа ги изгубила моторните и сензорните функции во нозете, а едната нога воопшто не ја чувствува. Лорен се движи со помош на инвалидска количка.
Цела деценија упорната девојка се борела за напредок во физикалната сала пред да сфати дека тоа само правело таа да се чувствува хендикепирана. „Не беше воопшто забавно. Отсекогаш сум била љубопитна личност, па започнав за се занимавам со акробатика. Имав многу сила во горниот дел од телото и тоа ми беше голема предност, но не можев да му кажам на мозокот како да ги користи моите нозе. Тоа ми стана опсесија која ме поттикнуваше да продолжам. Морав некако да му кажам на мојот мозок: Мораш да ги мрдаш нозете вака“ – изјавила Лорен во интервју за списанието „Provoke“.
Првиот предизвик на Вотсон бил да пронајде училиште кое ќе ја прими на часови. Откако го пронашла, цели шест месеци не можела да направи ништо друго освен да се исправи на една нога, но не се откажала. „Не можев да се качувам, но не се откажав. Ако се откажеш, ќе го поминеш остатокот од својот живот прашувајќи се што ако...“ – рекла таа.
Сите се сомневале дека Лорен ќе успее, особено нејзиниот физиотерапевт. „Некогаш се прашувам дали треба да му кажам на тој физиотерапевт дека уште повеќе ме мотивираше со недостигот на поддршка и на некој начин ми помогна да стигнам онаму каде што сум денес“ – вели таа.
По три години напорна работа, Лорен денес настапува пред публика и инспирира многумина да бидат истрајни во она што го прават. Според неа, хендикепот не треба да биде пречка за луѓето да ги следат своите соништа. „Со хендикеп или без, сите ние сме само луѓе кои го следиме сонот да бидеме најдобри што можеме да бидеме со она што го имаме“ – смета Лорен.
„Секој има нешто во животот кое го чувствува како товар. За мене тоа е мојот хендикеп, но ништо не може да ве запре освен вие самите. Ако навистина нешто сакате, тргнете кон него“ – додава таа. „Сакам да имам голем живот. Сакам да биде толку голем што кога моите внуци или нивните деца ќе го погледнат, ќе речат: И ние можеме да го постигнеме тоа“.