„Охрид е срцето на Македонија“: Дуке Бојаџиев со апел за спас на Охридското езеро, публиката запали 1.076 свеќи

Дуке Бојаџиев упати моќен апел за спас на Охридското езеро.

Успешниот музичар го посвети својот концерт на „Охридско лето“ за да ги повика одговорните лица да направат сè што можат за да го заштитат овој прекрасен македонски бисер.

Тој ја замоли публиката во преполното гледалиште на сцената „Долни Сарај” да запали свеќи како апел до надлежните.

Гореа вкупно 1.076 свеќи за спас на Охрид и крајбрежјето додека Дуке премиерно ја изведуваше композицијата „Охрид” со која го отвори концертот. „Охридското езеро станува сė позагрозено. Ги повикувам сите структури во државата да направат сė што можат” – рече тој.

„Потекнувам од Скопје, но уште од дете, повеќе се чувствувам како дома во Охрид отколку во Скопје. Охрид е срцето на Македонија. Настапувањето во Охрид секогаш претставува голема возбуда за мене затоа што чувствувам некаква енергетска поврзаност со езерото, со градот, па и со луѓето бидејќи имам огромен број пријатели овде, и тоа пријателства што ги негувам уште од детството“ – вели Бојаџиев.

ВИДЕО

На концертот заедно со Бојаџиев настапија и неговите долгогодишни соработници и чести гости на концертите, Исмаил Лумановски на кларинет, Мартин Ѓаконовски на контрабас и Костас Анастасиадис на тапани, како и актерката Наташа Петровиќ, вокал и нарација. Ова единствено музичко доживување беше збогатено и со гостувањата на македонската ѕвезда Каролина Гочева, Бранко Николов од Фолтин и гитаристот Георги Шарески.

На концертот присуствуваше и Претседателот Стево Пендаровски со сопругата Елизабета.

Имено, на Охрид и крајбрежјето им се заканува опасност од губење на статусот на заштитено културно и природно наследство на УНЕСКО, нешто што речиси исклучиво се случува само со културните и природните наследства под заштита на УНЕСКО кои се наоѓаат во региони погодени од војни или природни катастрофи.

Во случајот на Охрид и крајбрежјето, најголема закана се регистрираните дивоградби, а клучниот услов за ова да не се случи е нивно отстранување и воведување на мораториум на градење сè до донесување на интегриран план за управување со Охридскиот регион.