Официјално: Електрични тротинети само над 18 години, нема возење по двајца и брзина до 20 км на час

Собранието по скратена постапка ги донесе измените на Законот за безбедност на сообраќајот на патиштата, кои се однесуваат на регулирање на учеството на електричните тротинети во сообраќајот.

Со стапувањето на сила на овие измени, управувањето со електричен тротинет ќе им биде дозволено исклучиво на лица над 18 години, со што целосно се забранува малолетници да ги користат овие возила во јавниот сообраќај.

Максималната брзина се ограничува на 20 километри на час, а се забранува и превезување на сопатник. 

Предвидени се и поголеми глоби за сериозни прекршоци како пречекорување на дозволената брзина, возење под дејство на алкохол, превезување на друго лице и управување од страна на малолетно лице, а освен глобата, се остава и можност за одземање на тротинетот.

Целта на мерките е да се стави крај на сообраќајниот хаос поврзан со микромобилноста, да се намали бројот на сообраќајни незгоди и да се заштитат сите учесници во сообраќајот, со особен фокус на безбедноста на младите.

Никола Мицевски, еден од иницијаторите за законски измени, објави:

Денес го изгласавме Законот за изменување и дополнување на Законот за безбедност на сообраќајот на патиштата 🛴

Со новите измени воведуваме поголема безбедност и ред на патиштата, особено кога станува збор за лесните електрични возила (тротинети):

✅ Прецизна законска дефиниција за „лесно електрично возило“, усогласена со европските препораки и компаративните искуства во регионот

✅ Зголемена старосна граница – само лица над 18 години ќе можат да управуваат со лесно електрично возило

✅ Построги казни за непрописно возење – пречекорена брзина, возење под дејство на алкохол, превезување друго лице или малолетно лице зад управувачот

✅ Привремено одземање на возилото до 30 дена за најтешките прекршоци, дополнително на глобата
Целта е јасна – да се намалат сообраќајните незгоди и да се заштитат сите учесници во сообраќајот, особено младите.