Дајана Најад е првата личност која успеа да го преплива растојанието од Куба до Флорида без да користи кафез за заштита од ајкули. 64-годишната Американка си го оствари долгогодишниот сон. Ова беше нејзиниот петти обид да ги исплива долгите 180 километри.
„Никогаш не треба да се откажуваме... Никогаш не сте престари за да ги следите своите соништа“ – рекла амбициозната пливачка по пристигнувањето на целта, каде ја чекаше голема група одушевени поддржувачи.
Дајана пред да скокне во водата во Куба
Иако беше во немирната вода околу 53 часа, Дајана успеа без помош да ги изоди последните метри до плажата.
Дајана пристигнува на плажа во Флорида
Дајана за првпат се обиде од Куба да преплива до Флорида на 28 години, но разбрануваните води не ѝ дозволија да стигне до целта. Се обиде повторно во 2011 година, но беше принудена да застане поради напад на астма и нападите од медузи. Опасните медузи беа причината за нејзиниот неуспех и минатата година. Оваа година таа носеше специјална маска за лице за да се заштити од медузите.
Тим од 35 лица ја пратеше Најад низ длабоките води и ѝ помагаше да ги избегне ајкулите и бројните медузи. Во еден момент докторите биле премногу загрижени дека отечениот јазик и отечените усни ќе ѝ го отежнат премногу дишењето, но решиле да не се вмешуваат и да ѝ дозволат да си го оствари сонот.
Решителноста и храброста на Дајана восхитија милиони лица од целиот свет.
Во 1997 година Сузи Марони на 22-годишна возраст го преплива истото растојание, но со кафез за заштита од ајкули.