Хајди Клум ја претвори својата традиционална забава за Халовин во сцена од хорор филм. Славната манекенка, која со години ја носи титулата „Кралица на Халовин“, годинава се појави како џиновска отсечена дланка.
53-годишната Германка беше непрепознатлива во костимот со долги темноцрвени нокти и впечатливи прстени. Застрашувачкиот ефект го создаваа вештачката крв, изложените коски и ткивата кои висеа од „пресечениот“ зглоб, додека нејзиното лице беше скриено зад протетичка шминка во отвор на надворешната страна на дланката.
За да може да се движи, нозете на Хајди беа сместени во средниот и домалиот прст на огромната рака, а едната нејзина рака влегуваше во палецот.
На забавата во Њујорк пристигна придружувана од пет лица во жолти заштитни комбинезони и со маски на лицата, кои го надополнија необичниот настап. Во еден момент, член од придружбата ѝ помогна да се напие течност со шприц низ отворот кај устата.
„Зборувај ѝ на раката“ – напиша таа на Instagram покрај видеото со кое ја откри маската, откако со денови ја разгоруваше љубопитноста на обожавателите со снимки од подготовките.
Подоцна, Клум го отстрани надворешниот дел од костимот и откри уште еден изглед со руса перика и морничава протетичка шминка на лицето, задржувајќи ги огромните прсти околу нозете.
Хајди ја организира својата позната забава од 2000 година, а подготовките за следната трансформација често ги започнува веднаш по Халовин. Меѓу нејзините највпечатливи досегашни маски се црв, паун, вонземјанин и принцезата Фиона од „Шрек“.
