Вашиот хороскопски знак останува ист. Вагите си се ваги, шкорпиите – шкорпии, стрелците – стрелци.
Мината седмица светот го обиколи веста дека за хороскопот да биде точен, треба да бидат направени промени и да биде воведен дополнителен 13-ти знак – змијоносец. Веста се појави откако американскиот астролог Парк Канкл изјави дека повеќето луѓе треба да си го променат знакот и дека родените во периодот од 29 ноември до 17 декември се всушност претставници на знакот змијоносец.
Според Канкл, поради влијанието на гравитацијата на Сонцето и Месечината врз Земјата, настануваат сосема мали промени во земјината ротација, па сегашната поставеност на соѕвездијата во однос на Земјата не е иста со онаа од пред 3000 години.
Видни астролози потврдија дека појавата за која зборувал Канкл влијае само на сидералната астрологија, односно системот кој се користи во Индија. Но, дури и таму биле правени корекции во пресметувањата во текот на годините за промените да бидат земени во предвид.
Системот што се користи во Западната астрологија, кој и ние го користиме, воопшто не се влијае од оваа појава. Нашиот систем е „неподвижен“, т.е. движењето на Сонцето, Месечината и планетите се следи преку фиксирани сектори на небото. Овие сектори се непроменливи без разлика што се случува со земјината оска. Па, слободно можете да продолжите да си го читате хороскопот за знакот што си го знаете цел живот.