„Не се срамам што сум дете од село. Нема да заборавам од каде доаѓам“: Тиктокерот Динев сними видео на нива во родното село
Александар Динев сними видео во селото во коешто порасна и испрати силна порака дека се гордее со своето потекло и вредностите кои ги научил таму.
Популарниот македонски тиктокер ја одведе девојката Евче во родното село Балинци, Валандово, и покажа како изгледал животот на нива со неговото семејство.
Динев беше на нива со своите родители, помагајќи во собирањето зелка, а оттаму сподели албум фотографии. Преку емотивен опис, кој му донесе аплаузи и поддршка, тој искрено зборува за патот кој го поминал, потенцирајќи дека токму „валканите раце од работа“ го направиле човекот кој е денес.
Неговата објава ја пренесуваме во целост:
Не ми се верува дека некогаш ми било срам да кажам дека сум дете од село.
Денес… тоа е една од работите на кои сум најгорд.
Пораснав во Село Балинци. Место каде што деновите почнуваат рано, каде што рацете се валкаат од работа, а срцето се полни од едноставни работи. Чист воздух, природа, животни, фамилија… работи што како дете ги земав здраво за готово.
Дури кога заминав, сфатив колку вредат.
На 18 години направив храбар чекор и се преселив во Скопје. Град што ми даде можности, искуства, нови луѓе и простор да растам како личност. Тука научив многу работи. Научив да сонувам поголемо, да грешам, да се борам и да станувам повторно.
Но колку повеќе време поминува… толку повеќе ми фали дома.
Затоа што колку и да одиш напред во животот, има едно место што секогаш останува дел од тебе. Местото од каде што почнува твојата приказна.
Денес повторно бев на нива со моите. Собиравме зелка, се смеевме, работевме заедно… и си помислив нешто.
Ако доаѓаш од мало место, тоа не значи дека си ограничен.
Напротив.Тоа значи дека си пораснал со вредности што не се учат во книги…работа, трпение, благодарност и љубов кон семејството.
И колку и да одам напред… никогаш нема да заборавам од каде доаѓам.
Затоа што токму таму почнува мојата приказна.
И токму таму секогаш ќе биде мојот дом. 💛
