„Не ми е тешко затоа што ја сакам“: 8-годишно момче пешачи од Крагуевац до Белград за да собере средства за болната сестра
Мало детенце од Србија има огромна мисија пред себе – да помогне во собирањето средства за лекување на 7-годишната сестричка Јања, која се бори со ретка болест.
8-годишниот Јаков пешачи од Крагуевац до Белград за да го привлече вниманието на јавноста и да ги поттикне луѓето да донираат.
Јаков се одлучил на овој чекор за да може повторно да си игра со Јања и рекол дека не му е тешко да пешачи, затоа што многу ја сака.
„Сакам да ѝ помогнам на сестра ми да оздрави, за да можеме да си играме“ – рекол тој за Newsmax Balkans.
Јаков го започна својот подвиг придружуван од неговиот татко и група луѓе кои решиле секој чекор да го посветат на поддршка на Јања и нејзиното лекување.
Планот е за пет дена да стигнат во Белград, а патем ќе поминат низ неколку места, во кои многу луѓе веќе најавиле дека ќе ги пречекаат и ќе ја поддржат хуманитарната акција.
За неговиот подвиг, мајка му Тамара напиша:
Гордост која ја собира во едно мало, храбро срце. ❤️
Ова е мојот Јаков.
Мојот син.
Братот на Јања.И денес се гордеам со него повеќе отколку што зборовите можат да опишат.
Додека многу негови врсници размислуваат за игра и цртани, моето осумгодишно момче размислува само за една работа – како да ѝ помогне на својата сестра.
Облече маица, стави насмевка и тргна храбро – чекор по чекор за својата Јања.Тој не знае колку е голем неговиот пат.
Не знае колку луѓе се допрени од неговата насмевка.
Не знае колку сила ни дава на сите нас.Но, јас знам.
Знам дека во тоа мало тело чука огромно срце.
Знам дека неговата љубов кон сестра му е посилна од секој замор и секој километар.Јакове, мама е бескрајно горда на тебе.
Ти си нашиот мал херој.
И најголемиот борец за Јања. 💛Благодарност до сите кои се со нас и го следат секој негов чекор.
За Јања.
За нејзината победа. 💛
Јања боледува од Јубертов синдром, генетско нарушување поврзано со неразвиеност на малиот мозок и мозочното стебло.
Семејството собира средства за лекување во Германија, а потребни се најмалку 50.000 евра за испитувања и терапија.
„За Јања секој ден е победа. Таа е единствена жива личност во Европа со мутацијата на генот која ја има. Ние како родители никогаш нема да се откажеме од борбата“ – изјавила Тамара.