Три дена Њујорк беше домаќин на најбелите ревии на светот. Најпрефинетите дизајнери на невестински фустани создадоа непресушен извор на инспирација за девојките кои со радост ја планираат својата свадба.
Невестинската модна „недела“ ги обелодени венчаниците за сезоната есен 2013. Модните писти беа преплавени со деликатна чипка, слоевито реден тул, софистицирана свила и многу, многу цвеќиња.
Воопшто не е зачудувачки што доминираше снежната боја, но преферирањето на белата боја беше неочекувано од Вера Ванг, која во изминативе две сезони претстави црвени и борди и црни и бежови драматични венчаници.
Vera Wang
На огромна радост на идните невести, кралицата на невестинските фустани не ги заборави белата боја и нежната боја на слонова коска. Драматичните фустани создадоа интригантна колекција која Вера Ванг ја опиша како проучување на женственоста и романтиката, кое ги прославува невестинските фустани кои се нов приод кон класицизмот и декорирањето.
Monique Lhuillier
Ревијата на Моник Лулие потсетуваше на свадба од бајките. Низ волшебна шума манекенките дефилираа со романтични венчаници кои се вистинско олицетворение на женските соништа.
Carolina Herrera
Софистициран гламур преточен во фустани со силуета на сирена и асиметрични фустани со едно рамо беше претставен од страна на Каролина Ерера.
Oscar de la Renta
Оскар де ла Рента презентира мала колекција традиционални венчаници кои речиси и да немаа карактеристични детали. Префинетата изработка на текстурата ја истакна елеганцијата и нежноста на креациите.
Claire Pettibone
Клер Петибон понуди романтична колекција со модели кои го повикаа на сцена винтиџ стилот. Пастелни декорации и елементи инспирирани од долната облека ги красеа елегантните креации.
Marchesa
Шпанскиот дух и нескротливата темпераментност можеа да се насетат во креациите на Керен Крег и Џорџина Чепман, кои си поиграа со должината, силуетата, но и декорациите на венчаниците за да склопат богата колекција.
Dennis Basso за Kleinfeld
Дизајнерот Денис Басо претстави волуменозни фустани со храбри набори, впечатливи детали и цветни апликации.
Alfred Angelo
Брендот Alfred Angelo ги однесе присутните во светот на бајките, каде доминираат раскошните фустани со А-линија во стилот на принцезите.
