Момче принудено да ја напушти Украина и да ги остави омилените LEGO коцки доби подароци од целиот свет
Приказната на Андреј Сидиров ќе ви ја врати вербата во човештвото.
11-годишното момче било принудено да ги остави зад себе сите свои LEGO коцки кога избегало од Украина во Ирска. Откако татко му Игор објави апел за помош на социјалните мрежи, луѓе од целиот свет започнаа да му испраќаат пакети со коцки, греејќи им ги срцата на неговите родители.
„Многу луѓе ни испратија многу кутии, нови LEGO, користени LEGO, па мојот Андреј веќе создава играчки повторно. Многу е среќен. Седум дена нонстоп гради со LEGO“ – рекол таткото.
Андреј е LEGO фанатик. Тој има YouTube канал и Instagram профил каде ги објавува своите дела. За жал, семејството морало да остави сè зад себе и да ја напушти татковината.
Неодамна, Игор ги замоли луѓето кои имаат вишок коцки, да му помогнат на неговиот син.
„Мојот најголем син конструира и создава различни LEGO играчки на полу професионално ниво без инструкции. Тој е многу паметен, но војната промени сè. Ги оставивме сите наши LEGO во Украина. Ве молам помогнете ми! Ни требаат какви било LEGO, која било големина и боја во каква било количина. Сè е за развојот на детето“ – напиша таткото во апелот кој допре многу срца.
Ирска ги отстрани ограничувањата за Украинците кои пристигнуваат во земјата. Тоа им овозможува да влезат во државата без виза, да имаат пристап до здравствените услуги и право да работат.
