„Surreal Fashion“ е серијал фотографии на Натали Дибис, позната како Мис Анила, во кој модата се судира со уметноста, убавината се сретнува со апсурдноста, а високата мода со хаосот.
Младата фотографка за неколку години има создадено импресивно портфолио, а нејзините фотографии се мета на сè повеќе позитивни критики.
Секоја фотографија е приказна за себе. Локациите се менуваат – од француски замоци и класични домови во Лондон, до луксузни вили во Лос Анџелес. Најчесто погледот прво го заробуваат раскошни фустани, а потоа окото се хипнотизира од несекојдневното опкружување создадено со дигитална „манипулација“ која неретко вклучува и вметнување на уметнички дела.
