Младите европски амбасадори го изразија своето задоволство од потегот на Европската унија да ѝ додели неповратна финансиска помош во вредност од 80 милиони евра на Северна Македонија. Предвидено е овие средства, преку државниот буџет, да се искористат за полесно справување со ефектите од глобалната економска и енергетска криза. Инаку, платформата „Млади европски амбасадори“ е креативна мрежа на идни млади активисти од земјите од Западен Балкан, а нејзини членки се и активистките Шефкије А. Дика и Марија Бургиева.
Во контекст на слоганот „Енергијата нè поврзува“, под кој беше претставена финансиската поддршка од Европската унија, младата амбасадорка Шефкије А. Дика смета дека предизвиците на економски и енергетски план нè поврзуваaт сите во давањето на својот придонес за да ги надминеме колку што е можно побрзо и полесно. Според неа, улогата на младите е клучна на ова поле.
„Кога станува збор за енергетската независност и побрзата енергетска транзиција во нашата земја, младите можат да играат витална улога. Сметам дека улогата на младите е многу важна во менувањето на навиките и начинот на живот, почнувајќи од транспортот, користењето материјали што можат да се рециклираат и подигнувањето на еколошката свест“, дополнува таа.
Предвидено е пакетот за финансиска помош во вредност од 80 милиони евра како поддршка во буџетот на Северна Македонија да им го олесни финансискиот товар на ранливите категории граѓани, малите и средните претпријатија, кои беа први на удар од енергетската криза. Младата европска амбасадорка Марија Бургиева ги поздрави ваквите најави за распределба на доделените средства во буџетот.
„Да бев креатор на енергетските политики во земјава, ќе се фокусирав на промовирање и инвестирање во обновливи извори на енергија, спроведување мерки за енергетска ефикасност и обезбедување на енергетски пристап за сите граѓани, особено оние во руралните средини и домаќинствата со ниски приходи. Нашата земја е една од ретките кои го имаат сонцето како ресурс околу 300 дена во годината, само треба паметно да го искористиме“, вели Марија.
Двете млади амбасадорки сметаат дека земјава има огромен потенцијал да стане вистински „зелен енергетски хаб“. Преку континуираната поддршка што земјава ја добива од Европската унија во енергетската сфера, тие се согласни дека Северна Македонија треба да учи од искуствата на членките на Унијата и да инвестира во инфраструктура за обновливи извори на енергија, да воспостави политики и стимулации што промовираат зелена енергија и да ги поттикнува иновациите и претприемништвото во енергетскиот сектор.
Комерцијален текст