Арбони Габриел ја освои гламурозната круна на Мис Универзум. 28-годишната претставничка на САД победи на натпреварот за убавина кој се одржа во Ну Орлеанс.
Среќната убавица по крунисувањето изјави дека во новата улога ќе се обиде да менува животи. „Ќе бидам лидер на трансформации. Многу е важно да инвестираме во други, да инвестираме во нашата заедница и да го користиме нашиот уникатен талент за да направиме разлика. Сите имаме нешто специјално и кога ќе го засадиме тоа во други луѓе, ги трансформираме и го користиме тоа како двигател на промена“ – рече таа.
Габриел е модна дизајнерка чиј фокус е еко-модата, модел и инструкторка по шиење на жртви на семејно насилство и трговија со луѓе.
На прашањето што би променила во натпреварот за убавина, таа одговори дека би ја елиминирала возрасната граница од 28 години, бидејќи жените не се дефинирани од возраста.
Аманда Дудамел од Венецуела беше прогласена за прва придружничка, а Андреина Мартинез од Доминиканската Република за втора придружничка.
