На синоќешното затворање на Фестивалот на филмска камера „Браќа Манаки“ присуствуваше и Зоран Љутков.
Македонскиот министер за култура и туризам на црвениот тепих имаше неодолива придружба. Имено, тој зачекори пред Центарот на култура во Битола со ќеркичките Галена и Сирма.
За значењето на Фестивалот и поддршката на македонскиот филм, Љутков вели:
Фестивалот „Браќа Манаки“ не е само проекции на филмови. Тој е лабораторија на светлина и сенка, место каде што филмот не продава илузии, туку создава вистинска алхемија - меша реалност и сон, ризик и визија.
Филмот е отпечаток на реалноста, но и предвидување на иднината. Во него лежи моќта да нè разбуди, да нè предизвика, да нè соедини. И затоа, нашата одговорност е голема: да создадеме услови за новите генерации автори, кинематографери, продуценти. Да им дадеме шанса да бидат смели, да ризикуваат, да ја раскажат својата вистина.
Како министер, но и како актер, ветувам: филмот нема да биде статист. Тој ќе биде водечки лик во културната приказна на Македонија. Нашата поддршка ќе биде континуирана, модерна, храбра.
„Браќа Манаки“ е нашиот исчекор во светот на седмата уметност, врата што нè повикува да влеземе во живиот универзум на филмската уметност. И ако некој праша каде е Европа на филмската карта, одговорот е едноставен: овде, во Битола.. Во градот на конзерваторите на слика и емоција. Во Битола што гордо ја пушта камерата да врти, и да снима, и да памети.
Фестивалот можеби формално заврши, но неговата порака само што почнува да живее. А таа порака е едноставна: иднината на филмот е светла, затоа што е во рацете на визионери какви што сте вие.
Им честитам на овогодинешните лауреати, а на организаторите и градот Битола да им честитам на уште едно успешно фестивалско издание.
46-тото издание на „Браќа Манаки“ се одржуваше од 20 до 26 септември.
Фото: Ивона Кочов / Femina.mk