Се подготвуваат законски измени со цел да се стави крај на алармантниот тренд на врсничко насилство во училиштата. Министерката за образование и наука, Весна Јаневска, најави дека измените ќе предвидуваат директни санкции за родителите доколку нивното дете изврши насилство, но и доколку самите тие ги игнорираат повиците за соработка со училиштето и со останатите надлежни институции и одбијат да се вклучат во решавањето на проблемот.
Министерката појасни дека одлуката е донесена и дека во моментов активно се финализираат деталите околу законските решенија. Идејата е да се зголеми свеста и одговорноста кај семејствата преку воведување конкретни парични казни, со цел родителите поактивно да се вклучат во воспитниот процес на своите деца.
„Државниот секретар е во постојан контакт со пратениците. Веќе е донесена одлука, тие измени ќе се направат и останува глобата од 250 евра за секое сторено насилно дело на детето да биде казнет родителот, но и тоа што е многу важно – и кога родителот ќе одбие да соработува со училиштето и другите институции“ – изјави Јанева.
Реакцијата на институциите доаѓа по серијата немили настани кои силно ја вознемирија македонската јавност. Како последен аларм за итно дејствување кон создавање побезбедна училишна средина послужи неодамнешниот инцидент во основно училиште во населбата Ченто, каде што 15-годишен ученик претрпе повреди откако беше нападнат со остар предмет.
